luns, 17 de marzo de 2014


Isidro Parga Pondal procedía de dúas familias da burguesía galega de gran sona, preocupadas polo país. Era sobriño neto do vate Eduardo Pondal e neto do médico hidrólogo Isidro Pondal Abente por parte materna, e pola outra era neto de Salvador Parga Torreiro, catedrático de Dereito na Universidade de Santiago de Compostela e senador, e fillo de José Parga Casal, doutor en Dereito pola USC. Fixo os seus estudos de bacharelato en Santiago de Compostela e a carreira de química na Universidade de Madrid, rematando a licenciatura en 1922.
En 1923 obtivo praza de profesor auxiliar de Química inorgánica e Analítica na Facultade de Ciencias de Santiago. Porén, aparecen os seus primeiros traballos sobre xeoquímica, publicados na revista do Seminario de Estudos Galegos, nado recentemente e do que é membro. Realizou estudos de doutoramento en Zúric, voltando no 1933 a Santiago. Coa creación do Laboratorio de Xeoquímica da Universidade de Santiago de Compostela, comezou as súas investigacións sobre Galicia e formou os primeiros xeoquímicos españois. En 1934 rematou a súa tese de doutoramento obtendo a cualificación de sobresaliente cum laude na Universidade de Madrid. Ó comezo da Guerra Civil foi purgado do seu posto de profesor, retirouse a Laxe e creou unha empresa mineira para a explotación do caolín. Mais tarde creou o Laboratorio Xeolóxico de Laxe. En 1945 colaborou co Instituto Xeolóxico e Mineiro de España e en 1954 comezou a colaborar coa Universidade de Leiden, facéndoo despois coa de Montpellier, Estrasburgo, Zúric, Munster e Lisboa. Foi premio Ramón Mourente no 1958.